نبذة عن الكتاب
الكلام المكتوب في الكتاب دا كلام كلنا عايزين نبوح بيه، بس فيه اللي مش قادر يعبر، وفيه اللي مش حابب يتكلم، وفيه اللي مش عايز يخرجه من جواه، بس في نهاية الأمر كلنا جوانا الكلام ده، وكلنا بنحس بيه أول ما عينينا بتيجي عليه، وكأن احنا اللي كاتبينه مش حد تاني اللي كاتبه بالنيابة عننا، وكأن الكلام متاخد من جوانا بالحرف ومترتب.
فمتخافش أنت مش لوحدك.. هتلاقي كتير زيك هنا، وهتلاقي كتير عايشين وسط سطور الكتاب وحكايتهم مكتوبة باختصار، وبيقولوا هو ازاي الكاتب عارف كل اللي جوانا كدا؟!
الإجابة ببساطة.. إن عادي جدًّا يكون الكاتب واحد منكم، الكاتب أصلًا واحد منكم، هو بيكتب كل اللي جواك وأنت بتقرا اللي أنت مش عارف تطلعه من جواك بشكل مُرتب.
يمكن تلاقي هنا إجابة على أسئلتك اللي محيارك و مطيرة النوم من عينيك.
هتلاقي حل للغبطة اللي جواك وهتلاقي – إن شاء الله – ترتيب لأفكارك في عقلك، تشوف هنا عقلك ولا قلبك اللي هيكسبوا. عيش في الكتاب وكأنك بتقلب صفحات قلبك وبتتجول جوه خيوط عقلك، ادخل في رحلة كل موضوع واطلع كسبان إجابة لسؤال أو حل لمشكلة أو ترتيب لأفكار متلغبطة جواك.
تعالَ وادخل عالم قاريه وشايفه بعينيك، جرَّب ومش هتخسر حاجة، ولو مكسبتش يبقى على الأقل حاولت وعملت حاجة جديدة..
بتمنَّالك قراءة ممتعة ومربحة.. يلا بينا…!